Bèndidu t'as su campu fioridu

Dedicada a Efisio Trincas de su Partidu Sardu de Atzione chi at regaladu sa bandera de sos 4 moros a su re de Italia S. Berlusconi

1.
Bèndidu t'as su campu fioridu
Pro ti leare vanas violeras,
Torradiche a su buscu si ti seras
A ue as su pecadu commitidu.

2.
Bèndidu t'as ogni prètziu famosu,
Bene podes discurrer chi ses una,
Nàschida senza benes de fortuna
Fiza de unu babbu bisonzosu,
Cuddu bene chi aias pretziosu
Como l'as a ruina e isputzidu.

3.
Como etotu l'as fatu a ruina
Ch'àtera cosa nòbile non tenes,
Mancari chi conchistes milli benes
De sa menzus richesa ses meschina,
Vana, capriciosa, libertina,
Giughes unu caratere imprimidu.

4.
Giughes unu caratere in su fronte
Declarende sa tua disaura,
Pro non lu leger d'ogni criatura
T’esseres assolada in d’unu monte,
Pro ch'est giaru che sole in s'orizonte
Su tou disastru in breve sutzedidu.

5.
In su peus disastru che ruesti,
Su difetu s’est bidu meritàbile,
Como l'at fatu pius annotàbile
Cuddu viagiu longu chi fatesti
Pro su cale una pena nde tenzesti
Chi a estremos de morte ti hat batidu.

6.
A estremos de morte giutu t'at(a),
Mira chi cussa pena est malu crancu;
Cuada ti s'esseras a su mancu;
A su male e addite ses torrada?
Timo chi non che colet cust'annada
Senza torrare a su matessi nidu.

7.
A su nidu bi torras a piatzu
Si non lassas sa brulla ei su giogu,
Iscrie chi t'apparìtzent su logu
No siat chi b'incontres imbaratzu
E torras a li dare carchi abratzu
Ai cuddos chi tenes in confidu.

8.
In cunfidu e in giaru ti so nende
Befes cantu ti oferit sa natura,
Tue che cando esseras neta e pura
Tantas prendas de oro comporende,
Ma si tenes giudìtziu cumprende
Chi a tie non t'est nudda permittidu.

9.
A tie non ti deghent arracadas
A las giughere a pompa sona sona,
Postu ti nd’ant in manos una bona
De cuddas pius bellas e incrastadas,
Cun duas pedras tundas apicadas
Cun sa punta crudele che ispidu.

10.
Su giustu, non ti parzat ordivinzu.
Cunsidera chi sunt bonos fìnes,
Su chi podes ispendere in machines
Fàgheli a babbu tou unu cosinzu,
Ca si proet e faghet ludrinzu
In domo lu tenides istasidu.

11.
A su consizu meu atende e mira
Penso pro babbu tou, macca e vana,
Tue cun arraccadas e collana
Babbu tou sas solas tira tira,
Lu giuro chi non balet una lira
Cantu subra tue giughes bestidu.

12.
Pro cale sa idda est testimonza
De cantas befes chi a tie imploro;
Comporadu as un'aguza de oro
Senza sentire nissuna 'irgonza
Pro chi manna giughias sa conconza
Cantu cussa ch'infine t'han fichidu.

13.
Si poderes tesoros comporare
A su chi fìsti non bi torras cras,
Totu su bene tou dadu l'as
Non lu torras pius a conchistare;
Antzis pius prestu as a torrare
A su male chi totu t'an sentidu.

14.
In te non b'at pius presuntzione
Non ti meritas pius sentimentu,
Cari manna si seru aeras tentu
T'aias comporadu unu cuzone,
E ti fisti assolada che murone
Pianghende su bene chi as perdidu.

15.
Pro finis ecco giaros sos motivos
De cantas befes mèritana a tie,
Còmpora cantu cheres note e die
Arracadas, collanas e azivos,
Ma pensa chi dai ora tenes brivos
Sos raios de su prètziu candidu.


Merchioro Murenu (Macumere 1803 - 1854 )