Isula Misteriosa

S'Isula est misteriosa.
Pro chie ìschit abbaidare
pro chie no si acuntentat de sas aparèntzias
pro chie no si frimat a sas cartulinas
pro chie ischit ascurtare sas notes oscurosas
B'at cosas chi si movent silentziosas
in sos litos de sos montes
in sas paules neulosas de sas bassuras
in sas calancas, in sos trèmenes,
in sas andàinas chi non leant a neddue,
in sas carrelas de istiu, ingruiadas dae su sole
in foras de sas domos de sos umanos
b'at cosas chi chircant
sena pasu
isetant

Sa Surbentile o Surbile

Est una femina vampiru. Cumparit in formas diferentes. B'at chie narat chi est mesu femina e mesu colora. mesu femina e mesu gatu o mesu aranzolu. A onzi modu est una vampira. Sas vitimas preferidas sunt sos pitzinneddos minores. A de notte intrat a s'istantzia issoro dae su percolu de sa crae e, si sunt sena tentu, lis sutzat su sambene e los lassat mortos. S'unica manera pro difendere sas criaturas est de appiccare a su brassolu una farche ismarratzada. Sa surbile cando la bidet non podet faghere a mancu de si firmare a contare sas dentes de sa farche. Sigomente ischit contare fintzas a noe ebbia, cando lompet a noe torrat a incomintzare dae s'urtimu e gai li sighit totu sa note. Sa surbile est una vampira e no agguantat sa lughe de sa die, duncas cando e abreschet si devet fùere.

Su Mastringannu de sette berritas

Est un' omineddu minore minore, artu pagos tzentìmetros, chi giùghede in conca sette berritas rugias cun campaneddas. Est meda brullanu e li piaghet meda a leare in giru sos umanos. Est issu chi si divertit a cuare su marteddu a su mastru de linna, s'iscobulu a sa massaia, sa marrita a su bingiateri. A bois puru at a essere capitadu de lassare una cosa in unu zassu e de no l'agatare prus in logu. Est su mastringannu. A pustis de mes'ora de chirca mancari, torrades a abbaidare e la torrades a agatare in su primu zassu chi l'aiazis posta . Est de su mastringannu sa boghe chi bos mutit in dies de neula, chirchende de bon-che faghere perdere su caminu. Su mastringannu si divertit meda a tritzare sas giuas de sos caddos e finas a assustare su bestiamene in sas notes chena luna. B'at pastores chi l'ant bidu a caddu de una berbeghe currende e trubende su fiotu de sa roba. Si bos capitat de andare peri sos buscos dade cara si intendides boghes chi essint dae sas matas, cambiade caminu, su mastringannu est in chirca e si li ponides fatu non ais a torrare a domo pro chena.

Sa mamma de su Sole

Paret una femina arta cun su sole a su postu de sa cara. Sos bestires non si distinghent bene ca su lugore de sa cara illuniat sos chi la bident. Issa bessit a sa punta de su sole, in istiu, cando bi sunt sas cardanas e a giru no s'agatant mancu sas tzilighertas. Issa preferit a tennere sos pitzinnos chi si atrivint a bessire, pro cussu sos babbos e sas mammas no cherent chi sos figios andent a logu a cussas oras. Est meggius a no bessire ca la podides intoppare e bo-nche podet leare.

Gianas

Sas gianas sunt de diversas genias, sas prus connotas sunt minudas minudas bestidas cun unu bestire ruiu, bellas che frore. In conca tenet unu mucadore totu froridu chi lis arrivat a mesu ischina. Issas vivent in sas domus de gianas in ue nachi b'at posidos cuados. A de die dormint e a de note filant cun fusos de oro. Sas gianas sunt timidas e rispetadas ca si si arrennegant diventant malas a beru e podent ghetare maghias terribiles. B' at biddas intreas chi nachi sunt istadas maleitas dae sas gianas in tempos antigos e ancora a dies de oe nde patint sas conseguentzias.